آئی سی سی کی نئی ٹیسٹ رینکنگ جاری، ہیری بروک ٹیسٹ کے نمبر ون بیٹر بن گئے

دبئی: آئی سی سی نے ٹیسٹ اور ون ڈے کی تازہ پلیئر رینکنگ جاری کر دی، جس میں بیٹنگ، بولنگ اور آل راؤنڈرز کیٹیگریز میں اہم تبدیلیاں سامنے آئی ہیں۔

ہیری بروک نے ایجبسٹن ٹیسٹ میں 158 رنز کی شاندار اننگز کھیل کر جو روٹ سے ٹیسٹ کے نمبر ون بیٹر کا اعزاز چھین لیا۔ بروک اب 18 پوائنٹس کے فرق سے سرفہرست ہیں جبکہ روٹ دوسرے نمبر پر چلے گئے۔

شبمن گل نے 269 اور 161 رنز کی اننگز کے بعد کیریئر کی بہترین چھٹی پوزیشن حاصل کی۔ کین ولیمسن (تیسرے)، یشسوی جیسوال (چوتھے) اور اسٹیو اسمتھ (پانچویں) نمبر پر موجود ہیں۔

انگلینڈ کے وکٹ کیپر جیمی اسمتھ نے بھارت کے خلاف شاندار پرفارمنس (184* اور 88 رنز) پر 16 درجے ترقی کے بعد ٹاپ 10 میں جگہ بناتے ہوئے دسویں پوزیشن حاصل کر لی۔

ویان ملڈر نے زمبابوے کے خلاف ناقابل شکست 367 رنز بنائے، جس کے بعد وہ آل راؤنڈرز رینکنگ میں 12 درجے ترقی کے ساتھ تیسرے نمبر پر آ گئے۔ رویندر جڈیجا بدستور ٹاپ آل راؤنڈر ہیں۔

جسپریت بمراہ نے آرام کے باوجود ٹیسٹ بولرز میں پہلی پوزیشن برقرار رکھی، جبکہ محمد سراج 6 درجے ترقی پا کر 22ویں پوزیشن پر پہنچ گئے۔